Kis se darte ho
Kisi ka ehsaan maan lene se,
Ya kisi ko mehrbaan jaan lene se?
Tumhein koi zaroorat-mand na keh de,
Kaheen tum majboor na dikh jao.

Kis se darte ho
Maaf kar dene se,
Ya maafi maang lene se?
Tumhein koi kamzor na samajh baithe,
Kaheen tum kamtar na kehlao.

Kis se darte ho
Mohabbat karne se,
Ya mohabbat ke izhaar se?
Tumhein koi thukra na de,
Kaheen tum be-aabroo na ho jao.

Apne dil se poocho,
Yeh dar kis ka hai?
Kya apni ana se darte ho?

Yeh ana ki jang kis se?
Faqat apne aap se.

Kyun na riha ho kar ana ki qaid se,
Jeet lo zindagi ko phir se.