Kal phir ek desi dawat thi,
Kuch umdah sa pakwaan bhi tha.
Dawat thi bin wajah ki,
Mil baithne ka ek bahaana tha.
Khaali haath na aaya koi,
In thailon mein kya kuch na tha.

Kuch vase puraane bin packing,
Koi phool na un mein jachta tha.
Gulaab ki maanind Yankee Candle,
Ghar jis se apna mehakta tha.
Aaj khushbu thi na roshni thi,
Bas sirf dhuwan sa uthta tha.

Koi laya dish, koi laya bowl,
Na khanay ka, na dikhanay ka.
Khola bag to nazar parri,
Sale ka sticker chipka tha.
Marshalls tha ya TJ Maxx,
Dhundla sticker ek muamma tha.

Kuch biscuton ke tin bhi thay,
Aur dabbon mein kuch mewa tha.
Ek umr guzaari thi ghar ghar,
Expiry date se dikhta tha.
Par dekhne mein kya khoob lagay,
Dabba un ka vilayati tha.

Aur yeh tuhfa tha sab se alag,
Ek dabbay mein ek dabba tha.
Khola jab to gift ke saath,
Paigham liye ek ruqqa tha.
Pichlay safar ki duayein liye,
Hum tak yun aa pouncha tha.
Andar kya hai maloom nahin,
Na khola na unpack kiya.
Mehmaan ne humaray ujlat mein,
Joon ka toon hi pass kiya.
Chal bhai aagay doosray ghar,
Mera to tu farz nibha.

Mehmaan ki aamad hai abr-e-karam,
Mil baith ke dukh sukh hai bat-ta.
Yeh recycled tuhfay hain bin maane,
Sirf pyaar mohabbat ka do tuhfa.